माझ्या मनातली जयाप्रदा...

माझ्या मनातली जयाप्रदा...

सरगम चित्रपटाचा आणि माझ्या नृत्यकलेचा खूप जवळचा संबंध आहे. डफलीवाले डफली बजा... आणि परबत के इसपार... या दोन्ही गीतांनी माझी नृत्यकला जन्माला आली आणि पुढे पुढे ती बहरतही गेली. दूरदर्शनच्या छायागीतमध्ये ही गाणी जेव्हा जेव्हा लागायची तेव्हा तेव्हा त्यातल्या स्टेप्स बघून करायचा माझा प्रयत्न असायचा. आईवडिलांना या गोष्टीचं कोण कौतुक असायचं. जयाप्रदा या दाक्षिणात्य अभिनेत्रीचा हा पहिलाच चित्रपट. कसली सुंदर दिसत होती ती या चित्रपटात. धारदार नाक आणि सुबक चेहेऱ्याच्या या अभिनेत्रीने नृत्याबरोबरच तिच्या सौंदर्याचीही भूरळ घातली होती. आजही ही गाणी ऐकली की मन त्या काळात जाऊन रमतं.

आमचं परळगाव म्हणजे खरंच गावासारखं होतं. बिल्डिंगचा फारसा मागमूस नव्हता. बैठी एक मजली कौलारु घरं, वेगवेगळ्या आळ्या, देवळं आणि भरपूर लहान मुलं. सर्व सण अगदी गावासारखे साजरे होत. रामनवमी, हमुमान जयंतीला पालखी येत असे, जी अजूनही येते. सार्वजनिक गणेशोत्सव आणि सार्वजनिक पूजा यांचे विशेष कौतुक, सार्वजनिक गणेशोत्सव तर आम्ही लहान लहान मुलांनी एकत्र येऊन सुरु केला होता ज्याचे आज स्वरुप खूप मोठे झाले आहे आणि या सण-समारंभात माझा डफलीवाले या गीतावरचा नृत्याविष्कार हमखास ठरलेला असायचा. कित्येक वर्षे नाचत होते मी या गाण्यांवर. लक्ष्मीकांत प्यारेलाल यांच्या कर्णमधुर संगीताने समृद्ध असलेल्या सरगम या चित्रपटाने जयाप्रदासारखी अभिनेत्री दिली. दिसायला सुंदर आणि नृत्यातही तितकीच तरबेज. पण तरीसुद्धा तिला म्हणावे तसे नृत्यप्रधान चित्रपट मिळाले नाहीत असे मला वाटते. काही चित्रपट वगळता तिची ही नृत्यकला चित्रपटातून फारशी दिसली नाही किंवा तिचे चित्रपट नृत्याकरीता फारसे गाजले नाहीत.

तोहफा चित्रपटात शेकडो साड्यांच्या सेटवर तिला वेगवेगळ्या सांड्यामध्ये नाचताना बघायला खूप छान वाटले होते. मला विचाराल तर तिचे सौंदर्य साडीमध्ये अधिक खुलून दिसायचे. मध्ये भांग असलेली सैलसर वेणी, वेणीला खाली गोंडा आणि भरपूर गजरे किंवा कानाच्या मागे फुले, कानात झुमके...खूप आवडायचा मला हा पेहराव. लांब केसांची फॅशनच आली होती त्यामुळे. अशी ही जयाप्रदा तिच्या सौंदर्याने, अभिनयाने आणि अर्थातच नृत्याने माझ्यासारख्या बऱ्याच सखींना त्या काळात भूरळ घालत होती आणि आजही त्याच गारुड कायम आहे.