जादू तेरी नजर...

हरयाणाच्या अंबाला शहरात शिक्षण झालेल्या जुहीचे शालेय शिक्षण मुंबईच्या फोर्ट कॉनवेंट स्कूलमध्ये तर उच्च माध्यमिक शिक्षण सिडनॅहम कॉलेजमधून झाले. १९८४ साली मिस इंडिया झालेल्या जूहीने त्याच वर्षी मिस युनिव्हर्सच्या स्पर्धेत बेस्ट कॉस्च्युमचे अवॉर्ड घेतले होते. तिने कथ्थक नृत्याचे तीन वर्षांचे शास्त्रशुद्ध शिक्षण घेतलेले आहे. परंतू मध्ये हे नृत्य सोडावे लागल्यामुळे त्याची प्रचंड खंत तिच्या मनात आहे.

१९८६ साली सलतनत या चित्रपटातून आपली कारकीर्द सुरू केली असली तरी खरा ब्रेक तिला १९८८ साली आलेल्या कयामत से कयामत तक या चित्रपटाने दिला. या चित्रपटामुळे जूही आणि आमिर एका रात्रीत स्टार झाले होते. तिच्या व्यक्तिमत्त्वातला निरागसपणा आणि सोज्वळपणा प्रेक्षकांना असा काही भावला की तिने लाखो लोकांच्या मनावर अधिराज्य केले. त्यानंतर तिने अनेक सुपरस्टार हिरोंबरोबर अनेक सुपरहिट चित्रपट दिले. आमिर खान, शाहरुख खान यांच्याबरोबर तिची विशेष केमिस्ट्री जुळली होती. राजू बन गया जंटलमन, बोल राधा बोल, हम है राही प्यार के, डर, लुटेरे यासारखे एका पेक्षा एक सरस चित्रपट तिच्या नावावर जमा झाले.

हम है राही प्यार के मधील तिचा विनोदी ढंगाचा अभिनय प्रचंड ताकदीचा होता. सुरुवातीच्या भूमिकांमध्ये ती अगदीच टिपिकल सर्वसामान्य मुलींसारखी दिसत असली तरी लुटेरे आणि डर चित्रपटापासून तिने ग्लॅमरस अवतारही तितक्याच ताकदीने पेलला. हळूहळू तिने आपल्या व्यक्तिमत्त्वात आणि अभिनयात कमालीचा बदल घडवून आणला आणि इथेही तिच्या सोज्वळपणाला तिने कुठेही धक्का लावू दिला नव्हता.

सशक्त अभिनय आणि त्या त्या भूमिकांना तिने दिलेला न्याय तोही तिच्या व्यक्तिमत्त्वातल्या सोज्वळपणाला जपून हे खूप वाखणण्याजोगे आहे. जी गोष्ट अभिनयाची तीच नृत्याचीसुद्धा. तिने केलेल्या प्रत्येक नृत्यात तिची सहजता आणि नैपुण्य दिसून येते. मग ते नृत्य कोणतेही असो, लोकनृत्य, वेस्टर्न वा क्लासिकल प्रत्येक शैली तिने खूप सुंदर सादर केली आहे. घुंघट की आडसे, गोरीया रे, मेरे बन्नोंकी आएगी बारात, मि.लोवा लोवा अशी अनेक नृत्ये उदाहरणादाखल घेता येतील.

तिच्या नृत्यातला कॉमेडी सेन्स एकदम भन्नाट होता. बम्बई से गयी पूना, तू तू तू तारा, में कोई ऐसा गीत गाऊँ अशा अनेक नृत्यांत तिने कमाल केली आहे. ती कुठेही अति वाटत नाही की कमी वाटत नाही अगदी परफेक्ट. कितीही वेळा बघितली तरी कंटाळा येत नाही. काही काही ठिकाणी तर तिने हावभावांची इतकी विविधता दिली आहे की विचारूच नका. स्वतःची प्रतिमा जपून बॉलीवूडमध्ये आपला ठसा उमटवणारी अशी ही अभिनेत्री आहे. २०१४ ला आलेल्या गुलाबगँग या चित्रपटातील नकारात्मक भूमिकेने तर तिने आपल्या अभिनयाची वेगळी उंची दाखवून दिली.

कयामत से कयामत तक च्या पहिल्याच चित्रपटाला फिल्म फेअर अवॉर्ड मिळालेली ही अभिनेत्री नंतर शाहरुख खान बरोबर ड्रिम्स अनलिमिटेड ही कंपनी स्थापून निर्मातीसुद्धा झाली होती. तिने आपली कारकीर्द कुठल्याही वादाच्या भोवऱ्यात न अडकवता यशस्वी करून दाखवली.